Бүгін Зайсан ауданының Айнабұлақ және Жарсу ауылдарында жаңа спорт модулі ашылды. Бұл әлеуметтік нысандар шалғайдағы елді мекенде бұқаралық спорттың дамуына серпін беріп, жас таланттардың танылуына мүмкіндік туғызады, деп хабарлайды F16.kz.
Ауыл халқын қуантқан салтанатты шараға Шығыс Қазақстан облысының әкімі Нұрымбет Сақтағанов, Парламент Мәжілісінің депутаты Ерлан Саиров қатысты.
Жарсуда қазір 155 түтін бар. Жаңа нысан алақандай ауылдың ажарын кіргізіп, көркіне көрік қосып тұр. Ең бастысы мұнда енді мектеп оқушылары ғана емес, жергілікті тұрғындар да бұқаралық спортпен айналыса алады. Аймақ басшысы бұл спорт кешенінен болашақта талай-талай таланттар шығатынына сенім білдірді.
Қазақ халқы «Басты байлық – денсаулық» деп бекер айтпаған. Ал спорт – денсаулық кепілі. Мемлекет басшысы Қасым-Жомарт Тоқаев үнемі халықтың денсаулығына ерекше мән беріп, тиісті тапсырмалар беріп келеді. Бүгінгі мына ашылып жатқан спорт нысаны ауыл халқының салауатты өмір салтын ұстанып, денсаулығын нығайтуға зор мүмкіндік береді. Осы залдан алдағы уақытта салауатты, ой-өрісі жоғары, жан-жақты білімді де білікті жастарымыз көптеп өсіп шығады деп сенемін, – деді облыс әкімі.
Заманауи спорт кешені екі блоктан тұрады. Спорт залы қажетті құрал-жабдықпен толық қамтылған. Волейбол, футбол, баскетбол және басқа да ойындар ойнап, күрес және жекпе-жек түрлерімен шынығуға жағдай жасалған.
Әкімшілік-тұрмыстық блокта ерлер мен әйелдердің киінетін бөлмелері, душ кабиналары мен санитарлық тораптар қарастырылған. Спорт модулінің жалпы ауданы 853,1 шаршы метр, оның 556,9 шаршы метрі спорт залына, 296,2 шаршы метрі қызметтік бөлмелерге арналған. Мұнда күніне барлығы 84 адам жаттыға алады.
Шалғайдағы ауылдарда осындай нысанның ашылуы Amanat партиясының сайлауалды бағдарламасының нақты іске асып жатқанын көрсетеді. Егер аймақтар дамыса, Қазақстан да өркендейді. Сондықтан бірінші кезекте өңірлердің дамуына, оның ішінде шекаралық аудандардың нығаюына назар аударып, тізе қосып еңбек етуіміз керек, – деді Мәжіліс депутаты Ерлан Саиров.
Ауыл тұрғындарына спортпен тұрақты айналысуға мүмкіндік беріп, әлеуметтік және мәдени өмірді жаңа деңгейге көтеретін дәл осындай заманауи спорт модулі Айнабұлақ ауылында да қолданысқа берілді.
