Зайсан ауданының сегіз ауылына газ тарту мәселесі министрлікте келісіліп жатыр. Бұл туралы Қазақстан Республикасы Парламенті Мәжілісінің депутаты Ерлан Саиров айтты, деп хабарлайды F16.kz.
Зайсан ауданы аумағынан табиғи газ қоры табылғанына біраз жыл өтсе де, сол байлықтың игілігін көре алмай, әлі күнге от жағып, күл шығарып отырған ауылдар бар.
2013 жылы Сарыбұлақ кенішінде табиғи газ өндіріле бастағанда Зайсанның 18 елді мекенінен бөлек, көршілес Күршім, Тарбағатай, Марқакөл аудандарын газбен қамту жоспарланған. Алайда қазір жоспарланған 18 елді мекеннің 10-ы ғана көгілдір отынды пайдаланып отыр. Ал Дайыр, Біржан, Сарытерек, Сарыжыра, Көкжыра, Қуаныш, Жарсу, Бақасудағы ағайын әлі күнге дейін уәде етілген газды күтіп жүр.
Мәжілісі депутаты Ерлан Саиров Amanat партиясы өзінің сайлауалды бағдарламасында көрсетілген шекаралық аудандарды дамыту мәселесін ұдайы бақылауда ұстап отырғанын айтады.
Зайсан ауданы мәслихатының төрағасы Еркебұлан Зағыпаров және энергетика министрлігінің өкілдерімен Зайсан ауданының 8 ауылына газды апару мәселесін талқыладық. Бұл мәселе қазір министрлікте келісіліп жатыр. Газ тарту проблемасын шешуді біз бақылауда ұстаймыз, — деді ол.
Депутат нақты уақытын атамаса да, көмір тасып, күл шығарудан қажыған жұрттың үмітін қайта жаққандай болды.
Ал аудандық мәслихат төрағасы Еркебұлан Зағыпаров республикалық бюджеттің мүмкіндігі шектеулі болғанына қарамастан, Мәжіліс депутаттары шекаралық аймақты дамытуға баса назар аударатынын жеткізді.
Энергетика вице-министрі Қайырхан Серікұлымен кездестік, мәселені шешудің оңтайлы жолдары қарастырылды. Бүгін осы мәселенің нақты шешімін табу үшін Ерлан Саиров Amanat партиясы фракциясының атынан Энергетика министрлігіне нақты дәлелдермен хат жолдады. Мәселе оң шешімін тауып қалар деген үміттеміз. Құзырлы органдар газ тарту мәселесін оң шешуге қарсы емес, — деді Зағыпаров.
