Өскемендегі құрылыс нысандарының бірінде жүргізілген кезекті тексеріс барысында уәкілетті органның тиісті рұқсатынсыз жұмыс істеген 17 азамат ұсталды, деп хабарлайды F16.kz.
ШҚО ПД қызметкерлері көші-қон заңнамасын бұза отырып еңбек қызметін жүзеге асырып жүрген шетелдік азаматтарды анықтау мақсатында аймақтағы құрылыс нысандары мен базарларға тұрақты түрде тексеріс жүргізеді.
Шетелдік азаматтар облыс аумағына шамамен бір ай бұрын келіп, қажетті рұқсат құжаттарын рәсімдеместен, 10 күннен астам уақыт бойы нысанда жұмыс істеген. Көші-қон заңнамасын бұзғаны үшін шетелдіктер Қазақстан Республикасынан тыс жерге шығарылды, — дейді ШҚО ПД баспасөз қызметі.
Шетелдік жұмыс күшін заңсыз тартқан жұмыс беруші де әкімшілік жауапкершілікке тартылып, оған 100 АЕК мөлшерінде айыппұл салынды.
ШҚО ПД Көші-қон қызметі Қазақстан Республикасының аумағында уақытша жүрген шетелдік азаматтардың уәкілетті органның рұқсатынсыз еңбек қызметімен айналысуына тыйым салынатынын ескертеді. Заңнама талаптарын бұзу заңда көзделген жауапкершілікке әкеп соғады.
