Өскемендік жастар есірткіге қарсылықтарын көшедегі қабырға суреттері арқылы білдірді. Облыс орталығында «Заң мен тәртіп» және «Есірткісіз Шығыс» жобалары аясында graffiti фестивалі өтті, деп хабарлайды F16.kz.
Алғаш рет ұйымдастырылған байқауға 20 жас суретші қатысып, өз өнерін көпшілікке паш еткен.
Шараның негізгі мақсаты – жастарды салауатты өмір салтына баулу. Қазіргі таңда нашақорлықпен күрес — күрделенген мәселеге айналып барады. Креативті байқау ұйымдастырып, жобаға өз үлесін қосу идеясы колледж студенттері мен мектеп оқушыларынан туындады. Әрине, біз, әкімдік, облыстық прокуратура мен кәсіпкерлер бірден қолдады. Бүгінде қаламыздың 4 локациясынан түрлі граффитилерді тамашалауға болады, — деді Өскемен қалалық Жастар орталығының директоры Бақытжан Ерболқызы.
Ерекше қабырға суретімен көзге түскен қатысушылар бүгін салтанатты шара барысында марапатталды. Әр жас суретшіге алғыс хат, номиация мен ақшалай сыйлық табысталды.
Қоғамдағы өзекті мәселеге жастар да бей-жай қарамайтыны қуантады. Шара биыл облыс көлемінде өтсе, келесі жылы республикалық ауқымды байқау өткізуді жоспарлап отырмыз. Фестивальде жеңімпаз жоқ ,әр туынды өзінше ерекше, сондықтан қатысушылардың барлығы марапатқа лайық, — деді ШҚО прокурорының орынбасары Ерлан Бұланбаев.
