Қазақстанда «Заң мен Тәртіп» деп аталатын жаңа цифрлық сервис іске қосылды, деп хабарлайды F16.kz тілшісі Polisia.kz сайтына сілтеме жасап.
Енді азаматтар құқық бұзушылықтар туралы полицияға тікелей Egov Mobile қосымшасы арқылы хабарлай алады. Қосымшаның басты бетінде арнайы «Заң мен Тәртіп» түймесі пайда болды. Бұл түйме арқылы хабарламаны жедел жолдауға болады. Өтініш беру қарапайым әрі түсінікті. Қоғамдық тәртіпті бұзу, тұрмыстық зорлық-зомбылық, жол-көлік оқиғасы немесе балаға төнген қауіп сияқты жағдайлар туралы дабыл бірден полицияға түседі және құқық қорғау органдарының қызметкерлері хабарлама жеткен сәттен бастап әрекет етеді.
Осындай түймелер кейбір банк қосымшаларына да интеграцияланған, бұл сервисті кең аудитория үшін қолжетімді етеді.
– Жоба Ішкі істер министрлігі жүргізіп жатқан ауқымды цифрландыру процесінің бір бөлігіне айналды. Мақсат – полиция мен азаматтар арасындағы өзара әрекеттестікті жеңілдету және жеделдету, көмекті барынша қолжетімді ету. Сервис тәулік бойы жұмыс істейді, өтініштер бүкіл ел аумағында қабылданады, – деп жазады дерек көзі.
