Көлік және тіршілік қауіпсіздігі колледжі базасында «Заң және жастар» диалог алаңы ұйымдастырылды. «Заң және тәртіп» идеологемасы аясында өткен шараның негізгі мақсаты — жастардың құқықтық мәдениетін арттыру, студенттердің заң талаптарын сақтау жауапкершілігін қалыптастыру, құқық бұзушылықтың алдын алу, сондай-ақ жасөспірімдердің азаматтық белсенділігін дамыту, деп хабарлайды F16.kz.
Диалог алаңында спикер ретінде Өскемен қаласы прокуратурасының бөлім прокуроры Р.Т.Ахметжанов және ШҚО бойынша экономикалық тергеп-тексеру департаментінің жедел қызметкері В.Н.Толбаева сөз сөйледі. Мамандар өз баяндамаларында негізгі заң нормаларын түсіндіріп, интернет алаяқтық, дропперлік, қаржы пирамидалары және тыйым салынған заттарды тарату сияқты құқық бұзушылықтардың алдын алу мәселелерін талқылады.
Спикерлер практикалық мысалдар келтіріп, заңсыз іс-әрекеттерге қатысудың құқықтық салдарын түсіндірді. Сонымен қатар онлайн операциялар кезінде сақ болудың және күмәнді қаржылық ұсыныстарды сын көзімен бағалаудың маңызын атап өтті. Студенттер өздерін қызықтырған сұрақтарды қойып, кәсіби кеңестер алды. Ашық форматта өткен диалог сенімді атмосфера қалыптастырып, қатысушылардың белсенділігін арттырды. Іс-шара студенттердің құқықтық сауаттылығын тереңдетуге және заң талаптарын сақтаудың маңызын терең түсінуге ықпал етті.
