Катонқарағай аудандық сотында бағалы металды заңсыз өндіру және сақтау фактісі бойынша ұсталған тұрғынның ісі қаралып, ол әкімшілік жауапкершілікке тартылды, деп хабарлайды F16.kz.
Сот материалдарына сәйкес, биыл 31 шілдеде Үлкен Нарын ауылының маңында бағалы металл өндірумен айналысқан ер адам қолға түсіп, тінту жүргізілген. Тексеру кезінде оның жанынан құрамында 97,89 пайыз алтын бар 4,75 грамм металл табылды және ол тәркіленді.
Іс бұйрықтық өндіріс тәртібімен қаралды. Сот айыпталушының өз кінәсін мойындауын және істеген ісіне өкінетінін ескерді, жазаны ауырлататын мән-жайлар анықталған жоқ. Кінәлі тұлғаға ӘҚБтК-нің 295-1-бабы 1-бөлігіне сәйкес жаза берілді. Онда айыппұл, қоғамдық жұмыс немесе әкімшілік қамау қарастырылған. Сот шешімімен айыпталушыға 39 320 теңге мөлшерінде айыппұл салынды. Тәркіленген алтын мемлекет иелігіне өткізілді. Қаулы заңды күшіне енді.
