Өскеменнің 45 жастағы тұрғыны жылыжайда қарасора өсіріп келген. Ол «Қарасора-2026» жедел-профилактикалық іс-шарасы барысында анықталып, қолға түсті, деп хабарлайды F16.kz.
Тұрғынның тұрғылықты жерін тексеру барысында полицейлер жасыл түсті 6 түп өсімдік егілгенін анықтаған. Сондай-ақ моншадан құрамында өсімдік текті зат бар екі қағаз бума тәркіленді.
Сараптама қорытындысына сәйкес, тәркіленген өсімдіктер қарасора екені анықталған және есірткі құрал болып табылады. Кептірілмеген өсімдіктердің жалпы салмағы 1085 грамды құрады. Сонымен қатар, 2,65 грамм кептірілген марихуана мен құрамында темекі қоспасы бар марихуананың бар екендігі анықталды, — дейді ШҚО ПД баспасөз қызметі.
Белгілі болғандай, ер адам қарасора тұқымдарын интернет арқылы тапсырыс беріп, пошта арқылы алған. Оның айтуынша, бұл өсімдіктерді тек жеке мақсатта пайдалану үшін өсірген.
Аталған факті бойынша сотқа дейінгі тергеу амалдары жүргізіліп жатыр, күдіктіге қатысты келу туралы міндеттеме түріндегі бұлтартпау шарасы таңдалды.
