Жабылып қалған «Азия авто» зауытының 16 жүк көлігі «Таза Өскемен» кәсіпорнына берілді. Жаңа техникалар құрамалы жол машиналары ретінде қайта жабдықталып, қала тазалығына қолданылады. Бұл туралы қоғамдық кеңес отырысында айтылды, деп хабарлайды F16.kz.
Өскемен жолдарын күтіп ұстау мәселесін талқылау кезінде тұрғын үй-коммуналдық шаруашылығы, жолаушылар көлігі және автомобиль жолдары бөлімінің өкілі қаланың техникалық паркі жыл сайын жаңартылып жатқанын атап өтті. Оның айтуынша, жоғары аталған көліктерден бөлек бес грейдер мен шнекороторлар сатып алынған.
Биылғы қысқы маусымға қала көшелерін тазалау үшін 182 техника әзірленген. Оның 90-ы «Таза Өскеменге», 92-сі мердігер ұйымдарға тиесілі.
Бұған дейін өңір басшылығы 2025 жылдың соңына дейін немесе 2026 жылдың басында Өскеменге 25 жаңа арнайы техника сатып алынатынын хабарлаған.
Сонымен қатар сот шешімі шыққаннан кейін жауапты кәсіпорынның иелігіне тағы 40-тан астам техника беріледі деп жоспарланған.
