Шығыс Қазақстан облысының полицейлері кезекті рет заңсыз алтын өндірумен айналысқан адамдардың әрекетіне тосқауыл қойды, деп хабарлайды F16.kz.
Әлеуметтік желіде тараған бейнежазбадан иен далада тізілген көліктерді, уақытша тұруға арналған жұмысшылар үйін, қорыс-қопасы шыққан жерді және тау-тасты қопарған техникаларды көруге болады. Жердің бетін қырбық қар жауып қалғанына қарағанда бейнежазбаның түсірілгеніне көп болмаса керек. Өйткені тамыздың соңын ала Алтайда қыстың алғашқы белгілері байқала бастайды. Бейнежазбаның астына: “ШҚО ПД-ның қызметкерлері заңсыз жолмен алтын және бағалы металдар өндірумен айналысатын күдіктілерді үнемі ұстайды. Ал мына бейнежазба жуықта Үлкен Нарын ауданының Жайдақ учаскесінде түсірілген”, – деп жазды.
ШҚО полиция департаменті аталған факті бойынша сотқа дейінгі тергеу жүргізіліп жатқанын мәлімдеді.
Шығыс Қазақстан облысының полицейлері бұған дейін Жайдақ шатқалында заңсыз алтын және басқа да бағалы металдарды өндіру деректерін тоқтатқан. Аталған факті бойынша қазір сотқа дейінгі тергеу жүргізілуде.
Сонымен қатар, пайда болған ақпаратқа байланысты көрсетілген аумақта заңсыз әрекеттердің қайта жандануы мүмкіндігі бойынша полиция қосымша тексеріс жүргізетін болады, – деп хабарлады полиция департаментінің баспасөз қызметі.
Естеріңізге сала кетсек, жыл басынан бері полиция қызметкерлері облыс аумағында бірнеше рет заңсыз алтын өндіру дерегін анықтаған. Жуықта ғана өңірдің құқық қорғау органдары 19 шетелдік азаматты ұстағаны туралы жазғанбыз.
