Бүгін Өскемен қаласының №2 сотында Шығыс Қазақстан облысы әкімінің бұрынғы бірінші орынбасары Жақсылық Омарға үкім шықты. Сот оған 6 жыл мерзімге бас бостандығынан айыру жазасын кесті, деп хабарлайды F16.kz.
Сонымен қатар оның «Toyota» маркалы автокөлігі тәркіленіп, экс-шенеунік өмір бойына мемлекеттік қызметте, сот жүйесінде, жергілікті өзін-өзі басқару органдарында және квазимемлекеттік секторда қызмет атқару құқығынан айырылды.
Үкім алдында Жақсылық Омар соңғы сөзін айтты.
Қатты өкінемін. Оны сөзбен айтып жеткізу қиын. Маған артылған сенімге селкеу түсіргенім үшін қоғам алдында кешірім сұраймын. Бірақ сол сенімді қалпына келтіруге мүмкіндігім болады деп сенемін.
Құрметті сот, жәбірленушінің пікірін ескеруді сұраймын (сотталушыны бас бостандығынан айырмауды өтінген – ред.). Бұрын қол астымда жұмыс істеген адамға сеніп, одан ақша сұрағаным үшін өкінемін. Мен ақшаны бопсалап немесе заңсыз жолмен алмадым. Құрметті сот, қорғаушыларым айтқан жайттарды назарға алуыңызды өтінемін, – деді ол.
Естеріңізге сала кетсек, өткен айда әлеуметтік желілерде Жақсылық Омардың ұсталғаны жөнінде ақпарат тараған. Ол кезде облыс әкімдігі оның, денсаулығына байланысты уақытша еңбек демалысын алғанын хабарлаған. Арада бірнеше күн өткенде ҰҚК Жақсылық Омардың ұсталғанын растады. Сотта айыпталушы өзіне тағылған айыптарды мойындады.
Ұсталғанға дейін Жақсылық Омар Шығыс Қазақстан облысы әкімінің бірінші орынбасары қызметін атқарған. Оның алдында алты жыл Өскемен әкімі қызметінде болды.
Сот үкімі әлі күшіне енген жоқ.
