Синоптиктердің болжамынша, алдағы күндері еліміздің шығысында қалың қар жауып, артынан қатты аяз түседі. Облыстың кей аймақтарында бұрқасын соғады, деп хабарлайды F16.kz.
«Қазгидромет» ұсынған мәліметке сүйенсек, 10 желтоқсанда Шығыс Қазақстан облысы аумағында қалың қар жауып, бұрқасын болады. Солтүстік-батыстан, батыстан 15-20 м/с жылдамдықпен жел соғады. Ауа температурасы түнде -22-27, кей жерлерде -30 градусқа дейін төмендейді. 11 желтоқсанда түнде -25-30, облыстың солтүстігі мен шығысында -33 градусқа дейін аяз болады. Қалың қар мен қатты аязға байланысты ТЖД мамандары тұрғындарға елді мекеннен тыс жерлерге жолға шықпауды ескертеді. Ал егер шұғыл қажет болса алдымен жол жағдайын тиісті орындардан біліп, анықтау керек. Содан кейін көлікті жолға дайындап, өзіңізбен бірге байланыс құралдарын, қуаттағыш құралдарды және оларға қосалқы батареялар алған жөн. Азық-түлік, сіріңке және жылы киім, қол шам, шай құятын термос болсын. Жанармай қорының жеткілікті екендігіне көз жеткізу керек. Төтенше жағдай кезінде 112 нөміріне хабарласқан дұрыс.
