Елімізде баспана кезегінде тұрған адамдарды тұрғын үймен қамтамасыз ету заңнамасына өзгерістер енгізілді. Қазір ел бойынша шамамен 600 мыңға жуық әлеуметтік жағдайы төмен азамат үй кезегінде тұр, деп хабарлайды F16.kz.
ҚР Өнеркәсіп және құрылыс министрлігінің мәліметінше, 2025 жылдан бастап тұрғын үйге мұқтаж адамдарды тіркеу және жалға берілетін үйлерді бөлу ісі әкімдіктерден «Отбасы банкіне» берілді. Қазірг баспана кезегінде 951 мың адам тіркелсе, олардың көп бөлігі – әлеуметтік осал топқа жататын азаматтар.
Жаңа заңдағы маңызды өзгерістердің бірі – бұрын сатып алу құқығынсыз жалға берілген үйлерді жекешелендіруге мүмкіндік берілу. Бұл мүмкіндікті мемлекеттік бағдарламалар арқылы үй алған 70 мың адам пайдалана алады. Былтыр олардың 15 мыңы осы құқықты пайдаланып үлгерген. Оның ішінде 9 мыңға жуық адам тұрғын үйді тегін жекешелендірген.
Сонымен қатар мемлекет тарапынан қосымша қолдау шаралары да бар. Атап айтқанда, жалдамалы тұрғын үй ақысының бір бөлігін субсидиялау және тұрғын үй сертификаттарын беру қарастырылған. Бұл көмекті 11 мыңнан астам адам алған. Осы мақсатқа республикалық бюджеттен 7,6 млрд теңге бөлінген.
Айта кетейік, бұған дейін зейнетақы жинақтары арқылы тұрғын үй алудың тәртібі де өзгерген болатын.
