Алдағы жаңа оқу жылында Шығыс Қазақстан облысының мектептері бұрынғы кесте бойынша жұмыс істей береді. Бұл туралы облыстық білім басқармасы басшысының міндетін атқарушы Жанғазы Әліпбаев мәлімдеді, деп хабарлайды F16.kz.
Өңірдегі білім ордаларында сабақтың басталу уақытын өзгерту жоспарланып отырған жоқ. Жалпы білім беретін мектептерде сабақ бұрынғыдай штаттық режимде өтеді. Айталық, бірінші ауысымда сабақ сағат 8.00-де басталса, екінші ауысымның сабағы 19.15-те аяқталады. Сондай-ақ балабақшалар мен колледждердің жұмыс кестесіне де өзгеріс енгізілмейді, – деді Жанғазы Әліпбаев.
Естеріңізге сала кетейік, былтыр елімізде бір уақыт белдеуі бекітілген. Нәтижесінде Шығыс Қазақстан облысының мемлекеттік органдары жұмыс уақытын бір сағатқа ілгері жылжытты. Осыдан соң өткен оқу жылының соңында мектептерде сабақ кестесін өзгерту қажет пе, жоқ па деген мәселе туындады. Өйткені көптеген ата-ана жұмысқа 8.00-де баратындықтан баласын мектепке тым ерте апаруға тура келеді.
