IBF және WBO нұсқалары бойынша орта салмақтағы әлем чемпионы, қазақстандық былғары қолғап шебері Жәнібек Әлімханұлы шаршы алаңға қашан шығатынын айтты, деп хабарлайды F16.kz.
Мен АҚШ-қа ұшып бара жатырмын. Қараша айында жекпе-жекке дайын боламын. Адаместің енді санаулы мүмкіндігі қалды. Егер ол келісім бермесе, мен басқа боксшылармен рингке шығып, белбеулерімді қорғауға мәжбүр боламын! Сондықтан оған және оның менеджерлеріне айтарым, уақыт таяп қалды! – деп жазды Жәнібек Әлімханұлы әлеуметтік желідегі парақшасында.
Еске салайық, биыл сәуірде Жәнібек Әлімханұлы чемпиондық белбеулерін қорғау үшін Астанада француз Анауэль Нгамиссенгемен жұдырықтасып, оны нокаутпен жеңген. Осы жеңістен кейін ол бірнеше рет дивизион чемпиондарының бірімен үш белбеу үшін жекпе-жек өткізгісі келетінін мәлімдеген. WBC нұсқасы бойынша әлем чемпионы, доминикалық Карлос Адамес бұл ұсыныстан бас тартпағанмен көпшілік алдында үнсіз қалуды жөн санаған. Сауд Арабиясының ойын-сауық істері жөніндегі басқармасының басшысы, әлемдегі ең ықпалды промоутерлердің бірі Турки әл-Аш-Шейхтің айтуынша, Адамес қазақстандық боксшымен жекпе-жекке шығу ұсынысына жауап бермеген. Кейін қазақстандық боксшы әлеуметтік желіде Карлос Адамеспен сөз таластырып, оны бірнеше рет жекпе-жекке шақырды.
