Шығыс Қазақстан облысының әкімі Нұрымбет Сақтағанов Премьер-лигаға жолдама алған «Алтай» футбол клубының ойыншыларын құттықтады. Бұл тарихи сәттің Республика күні мерекесімен тұспа-тұс келуі жергілікті жанкүйерлерге екі есе қуаныш сыйлады, деп хабарлайды F16.kz.
Салтанатты рәсім жуықта ашылған Maxi Mall сауда орталығында болды. Байжігіт атындағы қазақ ұлт аспаптар оркестрі мерекелік кештің көрігін қыздырып, күмбірлетіп күй төкті, өскемендік өнер жұлдыздары әуелетіп ән салды.
Аймақ басшысы клуб ұжымын тарихи жетістігімен құттықтап, мінберге көтерілген футболшылар мен жаттықтырушыларға, бүкіл клуб мүшелеріне бірінші лиганың қола медалін тақты.
Айта кетейік, 24 қазанда Өскеменнің «Алтай» футбол клубы өз алаңында шымкенттік «Оңтүстік» командасын 4:1 есебімен жеңіп, маусымды үшінші орынмен аяқтаған. Сөйтіп Қазақстан Премьер-лигасына жолдама алды.
2023 жылы өңірде спорт саласын реформалауды бастаған едік. Сөйтіп, «Алтай» футбол клубы құрылды. Былтыр біздің команда Екінші лигадан Бірінші лигаға өтсе, биыл Премьер-лигаға жолдама алып отыр. Бұл нәтиже клуб басшылығының, бапкерлік құрамның, ойыншылардың еңбегі мен ауызбіршілігінің арқасында мүмкін болды, — дедi облыс әкімі.
Сонымен қатар аймақ басшысы болашақта Өскеменде жабық футбол стадионы салынатынын айтты. УЕФА-ның үшінші категориясына жататын жаңа стадионда «Астана» мен «Қайрат» клубтарын ғана емес, еуропаның үздік командаларын да қабылдауға мүмкіндік туады.
