Oskemen Hub базасында мемлекеттік қызметшілерге арналған жасанды интеллектіні мемлекеттік басқаруға енгізу тақырыбында шеберлік сабағы өтті. Іс-шараны Қазақстан Президенті жанындағы Мемлекеттік басқару академиясының Шығыс Қазақстан облысы бойынша филиалы ұйымдастырды, деп хабарлайды F16.kz.
Оған цифрлық басқару мен GovTech шешімдерін дамытуға қызығушылық танытқан аймақтық мемлекеттік қызметшілер қатысты. Негізгі мақсат — жасанды интеллект пен зияткерлік жүйелерді басқару тәжірибесінде қолдану мүмкіндіктерімен таныстыру, қатысушылардың цифрлық сауаттылығын арттыру және аймақтарда инновацияны ілгерілетуге ынталандыру.
Шеберлік сабағында Д.Серікбаев атындағы ШҚТУ-дың Құзыреттер және технология трансфері орталығының басшысы, Руслан Четтыкбаев жасанды интеллекті негізіндегі шешімдердің мемлекеттік басқарудағы нақты қолданылу жолдарын ұсынды. Яғни азаматтардың өтінішін интеллектуалды талдау, мониторинг және болжау жүйелерін пайдалану.
Oskemen Hub жетекшісі Дидар Мұратұлы өңірдегі GovTech бағытындағы жобаларға шолу жасады. Ол мемлекеттік қызмет сапасын арттыруға бағытталған бастамалар мен оларды жүзеге асыруда жас IT-мамандардың белсенді қатысуын атап өтті.
Осы ретте Oskemen Hub алаңы өңірлік инновациялар мен цифрлық саясатты біріктіретін орталық ретінде тиімді жұмыс істеп жатқанын атап өткен абзал.
Мемлекеттік басқаруды цифрландыру — қазіргі мемлекеттік саясаттың негізгі басымдықтарының бірі. Технологиялар қарқынды дамып жатқан бүгінгі заманда жасанды интеллектінің және заманауи цифрлық шешімдердің мемлекеттік органдардың тиімді әрі ашық жұмыс істеуіндегі рөлін түсіну ерекше маңызға ие.
