Шығыс Қазақстан облысында жасөспірімдердің қаржылық сауатын арттыратын «Qarzhy Sagshysy» білім беру жобасы жалғасып жатыр. Бұл бастама еліміздің барлық өңірлерінде «Заң және тәртіп» нарративі мен «Адал азамат» жобасы аясында жүзеге асырылып келеді, деп хабарлайды F16.kz.
ШҚО бойынша экономикалық тергеп-тексеру дапертаментінің мәлімдеуінше, 1–15 желтоқсан аралығына жоспарланған білім беру ойынына облыстағы мектептердің 10–11 сынып оқушылары мен колледж студенттері қатысады. Жоба AML Academy және ҚР Қаржылық мониторинг агенттігінің бастамасымен, Оқу-ағарту министрлігінің қолдауымен әзірленген.
Ойын не үйретеді?
«Qarzhy Sagshysy» — жасөспірімдердің қаржылық сауатын, киберқауіпсіздік мәдениетін, цифрлық гигиенаны және жеке жауапкершілікті дамытуға бағытталған 2D форматтағы интерактивті оқу ойыны.
Ойын төрт негізгі модульден тұрады:
- қаржылық тәуекелдер
- киберқылмыс
- психологиялық қауіптер
- қауіпсіз мінез-құлық дағдылары.
Қатысушылар қаржы пирамидалары, дроп-қызметтер, фишинг, интернет және телефон алаяқтары, жалған сайттар және эмоциялық манипуляция секілді қазіргі заманғы киберқауіптерді тануды меңгереді. Сонымен қатар жеке деректерді қорғау ережелері мен ресми ақпарат көздерін дұрыс қолдану жолдары үйретіледі.
Жеңімпаздар қалай анықталады?
Ойын аяқталған соң аудандық, облыстық және республикалық деңгейдегі үздік қатысушылар анықталады. Жеңімпаздар мен жүлдегерлер 22–31 желтоқсан аралығында дипломдармен және естелік сыйлықтармен марапатталады.
ШҚО бойынша экономикалық тергеп-тексеру департаменті өкілдерінің айтуынша, жастардың қаржылық сауатын арттыру — алаяқтықтың алдын алудың негізгі жолдарының бірі. Осындай жобалар жасөспірімдердің цифрлық ортадағы қауіпсіз мінез-құлқын қалыптастырып, ақпараттық сауат деңгейін көтеруге мүмкіндік береді.
