ШҚО әкімі Нұрымбет Сақтағанов өңір тұрғындарымен және Шымкенттен келген кәсіпкерлермен кездесіп, жеке мәселелері мен ұсыныстарын тыңдады, деп хабарлайды F16.kz.
Жеке қабылдауға келген шымкенттік кәсіпкер Тарбағатай ауданында агроөнеркәсіптік кешенді дамыту туралы ұсынысын білдірді. Облыс әкімі кәсіпкерге толық құжаттар топтамасын дайындауды тапсырды.
Облыс орталығының тұрғыны сол жағалауды абаттандыру мәселесін көтерсе, өскемендік кәсіпкер «Самал» саябағында кәсіпкерлік мақсаттағы алаңды жалға алу барысында туындаған кедергілерге шағымданды. Оның айтуынша, ұзақ уақыт өтсе де мәселенің шешілетін түрі жоқ.
Өскемен қаласының әкіміне аталған жағдайларға нақты баға беріп, кінәлі тұлғаларды жауапкершілікке тартуды, абаттандыру, келісімшарттар мәселелерін реттеуді және жалға беру мүмкіндігін қарастыруды тапсырамын. Сондай-ақ «Самал» және Жамбыл атындағы саябақтарды дамыту бойынша сәулеттік тұжырымдама әзірлеңіздер, — деді аймақ басшысы.
Белокаменка ауылының тұрғыны ауылдық инфрақұрылымның жай-күйі мен жерді заңсыз пайдалану мәселесін көтерді. Облыс әкімі бұл мәселелер бойынша тиісті бақылаушы органдарға материал жолдауды тапсырды.
Қазақстанның еңбек сіңірген өнер қайраткері Анатолий Лаптев облыс әкіміне Олжас Сүлейменовпен бірлесіп дайындалған «Алтай жолы» деректі фильмінің жобасын ұсынып, «Достық өзені – Ертіс» фильмі туралы идеясымен бөлісті.
Бұл фильмдер өңіріміз туралы болғандықтан мәдениет, ішкі саясат және туризм басқармалары оларды қаржыландыру мүмкіндігін қарастыруы қажет. Мұндай мәдени туындылар туризмнің дамуына да, облыстың оң имиджіне де зор үлес қосады, – деді Нұрымбет Сақтағанов.
Азаматтардың барлық өтініштері қаралып, бақылауға алынды.
