Шығыс Қазақстанда ауа райының нашарлауына байланысты облыстық және республикалық маңызы бар жолдарда көлік қозғалысына шектеу қойылды, деп хабарлайды F16.kz.
Қазір Өскемен – Риддер – РФ шекарасы автожолының 15-105-шақырымында (Белоусовка кентінен – Риддер қаласына дейін) және Осинов асуында тіркемесі бар және жартылай тіркемелі жүк көліктерінің қозғалысы уақытша шектелді.
Шектеу Өскемен – Алтай – Катонқарағай – Рахман қайнары автожолының 46-66-шақырымындағы (Северное ауылы – Серебрянка қаласы) учаскесінде көктемге дейін сақталады.
Сонымен қатар «ОблШығысЖол» ЖШС бүгін сағат 10.00-ден бастап облыстық маңызы бар Шемонаиха – Секисовка тас жолының 0–56 шақырымына (Шемонаиха қаласынан Секисовка ауылына дейін) тіркемесі және жартылай тіркемесі бар жүк автокөліктерінің қозғалысына шектеу енгізілгенін хабарлады.
«ҚАЖсервис» ЖШС Шығыс Қазақстан облыстық филиалының ақпараты бойынша, сағат 10.00-ден бастап республикалық маңызы бар Алматы – Талдықорған – Өскемен – Шемонаиха – РФ шекарасы автожолының 1104–1212 шақырым аралығы (Глубокое кентіне бұрылыстан РФ шекарасына дейін) тіркемесі және жартылай тіркемесі бар жүк автокөліктерінің қозғалысына шектеу енгізілді.
Сағат 12.00-ден бастап Алматы – Талдықорған – Өскемен – Шемонаиха – РФ шекарасы тас жолының 1013–1062 шақырым аралығы (Абай облысы шекарасынан Алмасай ауылына бұрылысқа дейін) және Өскемен-Семей жолының 12-103 шақырымында (Казачье ауылынан Абай облысы шекарасына дейін) тіркемесі және жартылай тіркемесі бар жүк автокөліктері мен жолаушылар автобустарының қозғалысына шектеу енгізіледі.
