Қазақстанда биыл жеке куәлік пен төлқұжатты онлайн форматта қайта рәсімдеу мүмкіндігі іске қосылуы мүмкін. Бұл туралы жасанды интеллект және цифрлық даму жөніндегі бірінші вице-министр Ростислав Коняшкин мәлімдеді, деп хабарлайды F16.kz.
Оның айтуынша, жаңа цифрлық қызмет Ішкі істер министрлігімен бірлесіп жүзеге асырылады. Алғашқы кезеңде бұл сервис тек жарамдылық мерзімі аяқталған немесе жоғалған құжаттарды қайта жасатуға қолданылады. Ал төлқұжатты алғаш рет алу рәсімі әзірге дәстүрлі, яғни офлайн форматта қала бермек. Бұған азаматтың жеке басын тікелей растау қажеттілігі себеп.
Бірінші вице-министр цифрландыру жұмыстары кезең-кезеңімен енгізілетінін атап өтті.
Жеке куәлікті жоғалтуға байланысты қайта рәсімдеу, сондай-ақ жаңасын алу мүмкіндігі қарастырылған. Сонымен қатар төлқұжатты онлайн форматта алу қызметін іске қосуды көздеп отырмыз. Қазір жүргізуші куәлігін қайта рәсімдеу онлайн жүзеге асырылады, сондай-ақ жүргізуші куәлігін алғаш рет алуға өтінім беру де цифрлық форматта қолжетімді. Алдағы уақытта бұл қызметтерді баламасыз, яғни тек онлайн форматта ғана көрсетілетін деңгейге көшіру жоспарда бар. Осылайша, азаматтар біртіндеп цифрлық сервистерді меңгеріп, келесі жолы халыққа қызмет көрсету орталықтарына жүгінбейді деп ойлаймыз, – деді Ростислав Коняшкин.
Бұл ретте қызметтердің қауіпсіздігі, деректердің қорғалуы және пайдаланушылар үшін қолайлылық негізгі басымдық болмақ.
