Құқық қорғау органдары өңір тұрғындарына әлеуметтік желіде барынша жауапты болып, заңды қатаң сақтау керектігін ескертеді, деп хабарлайды F16.kz.
Қазіргі таңда әлеуметтік желіде ақпарат көз ілеспес жылдамдықпен тарайды . Осы орайда тәртіп сақшылары этносаралық келісім мәселелеріне және интернеттегі арандатушылықтың алдын алуға ерекше назар аударып отыр.
Қазақстан – көпұлтты мемлекет. Мұндағы этноаралық бейбітшілік пен келісім – тұрақтылықтың негізі. Алайда соңғы кезде тұрмыстық жанжалдар әлеуметтік желілерде бұрмаланып, этносаралық араздықты қоздыруға себеп болған жағдайлар жиілеп кетті. Мұндай әрекеттердің артында жағдайды тұрақсыздандыру мақсатында жалған әрі арандатушы ақпарат тарататын арам пиғылды блогерлер тұрады, — дейді облыстық прокуратура өкілдері.
Сондықтан құқық қорғау органдары араздықты қоздыру, сепаратизм және жаулыққа шақыру әрекеттері үшін Қылмыстық кодекстің 174 және 180-баптары бойынша 20 жылға дейін бас бостандығынан айыру жазасы көзделгенін еске салады.
Әрбір азамат білуге тиіс жайттар:
• Арандатушылық жазбаларға пікір жазбаңыз және оларды таратпаңыз;
• Күмәнді тікелей эфирлер мен чат-рулеткаларға қатыспаңыз;
• Интернеттің әсеріне әсіресе бейім балалармен түсіндіру жұмыстарын жүргізіңіз;
• Қақтығыс жағдайын байқаған жағдайда оны әлеуметтік желіге жарияламай, 102 нөміріне немесе жергілікті құқық қорғау органдарына хабарласыңыз.
Интернетте анонимдік жоқ. Әр адам виртуалды кеңістікте жасаған әрекеттері үшін жауап береді. Заң жылдам әрі тиімді жұмыс істейді, – деп атап өтті облыстық прокуратурада.
Азаматтарды тек ресми ақпарат көздеріне сенуге және желідегі кез келген хабарламаларға парасатпен қарауға шақырады.
