Шығыс Қазақстан облысына жұмыс сапары барысында өнеркәсіп және құрылыс вице-министрі Иран Шархан жергілікті тұрғындармен кездесті. Бұл басқосу – мемлекеттік органдардың ашықтығын кеңейтуге арналған тұрақты қоғамдық диалог алаңдарының бірі, деп хабарлайды F16.kz.
Жиын барысында тұрғындар жер қойнауын пайдалануға рұқсат беру тәртібі, геологиялық зерттеу жүргізу талаптары, экологиялық қауіпсіздікке қатысты сұрақтар және компаниялардың әлеуметтік міндеттемелерді орындауы сынды мәселелерді көтерді. Сонымен бірге мемлекеттік бақылау жүйесі, жобаларды келісу рәсімдері, минералдық-шикізат қорын дамыту мен жергілікті қауымдастықтардың мүдделерін ұштастыру жайы талқылаудың негізгі өзегіне айналды.
Вице-министр қазіргі реттеу нормалары, геология саласындағы цифрландыру үдерістері, ашық мониторинг механизмдерін енгізу және инвесторларға арналған рұқсат алу рәсімдерін жеңілдету жөнінде ақпарат берді. Иран Шархан ведомство тарапынан қоғаммен ашық әрі тікелей диалог жүргізуге дайын екенін, азаматтар көтерген мәселелерге жедел әрекет ету маңызын атап өтті.
Кездесуден кейін қосымша түсіндіру жұмыстарын жүргізу, кеңестер ұйымдастыру және жергілікті атқарушы органдармен өзара іс-қимылды күшейту жөнінде бірқатар тапсырма берілді.
Министрлік тұрғындармен ашық форматтағы осындай кездесулерді жалғастырып, оларды салалық саясатты жетілдіру мен үкімет, бизнес және қоғам арасындағы өзара сенімді арттырудың маңызды құралы ретінде қарастыратынын мәлімдеді.
