Өскеменде жеке тұрғын үйде өрт шығып, құтқарушылар ер азаматты ажал аузынан алып қалды, деп хабарлайды F16.kz.
Төтенше жағдай Дружба көшесінде орналасқан жер үйде болған. Оқиға орнына дереу жеткен өрт сөндірушілер жалынмен арпалысып жүріп үй ішінде ес-түссіз жатқан ер азаматты тауып алады. Құтқарушылар оны сыртқа алып шығып, Апаттар медицинасы орталығының дәрігерлерімен бірге реанимациялық көмек көрсетті. Дер кезінде көрсетілген алғашқы медициналық көмектің арқасында ер адам есін жиып, тыныс алуы қалпына келді. Зардап шегуші ауруханаға жеткізілді. Дәрігерлер оның түтіннен уланғанын анықтады.
Төтенше жағдайлар қызметінің хабарлауынша, өрттің шығуына отты пайдалану кезінде қауіпсіздікті сақтамау себеп болған көрінеді. Шамамен 35 шаршы метр аумақты шарпыған тілсіз жау сөндірілді.
76 мың рейд өтті
Бүгінде облыс аумағында өрттің және түтінге уланудың алдын алуға бағытталған профилактикалық жұмыстар жүргізіліп жатыр. Жылыту маусымы басталғалы бері пешке от жағатын тұрғын үйлерді аралаған 76 мың рейд өткізілген. ТЖД мамандарының кеңесімен 3 мыңнан астам бұзушылық жойылған.
Сондай-ақ құтқарушылар әлеуметтік осал санаттағы отбасылар тұратын 2763 үйді есепке алып, тиісті қолдау көрсетілді.
Өрт неден шығады?
Көп жағдайда жеке тұрғын үйлерде өрттің шығуына пештегі саңылау немесе жарық, мұржаның тазаланбауы, пеш алдына металл қаңылтыр төселмеуі, сондай-ақ электр желілері мен электр жабдықтарын пайдалану кезінде қауіпсіздік талаптарының сақталмауы себеп болған.
Статистика не дейді?
ШҚО ТЖД мемлекеттік өрт бақылау басқармасының бастығы Нұржан Өміржанов жылыту маусымы басталғалы бері облыс аумағында 235 өрт тіркелгенін, бұл былтырғы сәйкес кезеңмен салыстырғанда 23%-ға көп екенін атап өтті. Пешті пайдалану кезінде қауіпсіздік талаптарын сақтамау салдарынан шыққан өрттің саны 60%-ға артқан. Өрттен қаза тапқан адамдар саны 8%-ға өскен.
