Ұлан ауданында полицейлер еркін жайылымға кеткен 12 жылқыны ұшқышсыз ұшу аппаратының көмегімен тапты, деп хабарлайды F16.kz
Жылқыларды іздеу аумақтың кеңдігі мен жер бедерінің күрделілігіне байланысты қиындық туғызған. Осыған байланысты полиция қызметкерлері жерді жедел шолып шығу үшін ұшқышсыз ұшу аппаратын пайдаланған.
Әуеден жүргізілген бақылау нәтижесінде ауқымды аумақ қысқа уақытта тексеріліп, жылқылардың жүрген жері анықталды. Жануарлар жоғалған жерден 27 шақырым қашықтықтан табылды. 12 жылқының барлығы иесіне қайтарылды, — дейді ШҚО ПД баспасөз қызметі.
Ұшқышсыз ұшу аппаратын пайдалану іздеу уақытын едәуір қысқартып, ашық әрі жетуі қиын аумақтарды жедел тексеруге мүмкіндік берді.
Шығыс Қазақстан облысының Полиция департаменті ауыл шаруашылығы жануарларының иелерін малдың жайылымдағы қозғалысын бақылауда ұстауға және қараусыз қалдырмауға шақырады.
