Шығыс Қазақстан облысында 104 шақырым жолға асфальттың төменгі қабаты төселді, деп хабарлайды F16.kz.
Мемлекет басшысының тапсырмасына сәйкес, елімізде республикалық маңызы бар автожолдарды орташа жөндеуден өткізуге бағытталған ауқымды жұмыстар жүргізіліп жатыр.
Көлік министрлігі таратқан ақпарат бойынша, бүгінде республика бойынша жалпы ұзындығы 4 мың шақырым жолды қамтитын 177 жоба жүзеге асырылып жатыр. Оның 160-ы –2024 жылдан өтпелі жоба болса, 17 жоба биыл жаңадан бастау алған. Жөндеу жұмыстары жолдың негізгі қабатын қайта өңдеуден бастап, үстіңгі жабынды төсеуге дейінгі барлық кезеңдерді қамтиды.
– Республикалық маңызға ие тасжолдарда жүргізіліп жатқан орташа жөндеу жұмыстары аясында 843 шақырымға төменгі жабын қабатын төсеу жұмыстары жүргізілді. Атап айтқанда, Қостанай облысында – 143 шақырым, Қарағанды облысында – 116 шақырым, Шығыс Қазақстан облысында 104 шақырым жолға асфальттың төменгі қабаты төселді, – деп хабарлайды дерек көзі.
