Қазақстанда жолаушылар пойызында Starlink интернет желісі қосылуы мүмкін. Бұл туралы «ҚТЖ» ҰК» АҚ басқарма төрағасының орынбасары Әнуар Ахметжанов мәлімдеді, деп хабарлайды F16.kz.
Оның айтуынша, ғаламдық интернет ең бірінші «Тальго» пойыздарында қосылады. Бүгінде жүйе сынықтан өткізіліп жатыр.
Starlink интернеті пойыздарда сынақтан өткізілуде. Егер нәтиже оң болса, жоба ауқымы кеңейеді. Байланыс сапасы жақсы, бірақ еліміздің аумағы кең болғандықтан әр өңірде қалай жұмыс істейтінін тексеріп көру қажет, – деді Әнуар Ахметжанов.
Жоспар бойынша, WhatsApp мессенджері жолаушыларға тегін пакет ретінде ұсынылады. Ал бейнемазмұн мен басқа да ауқымды қызметтерге қосымша ақы төленеді.
Ұлттық компания өкілінің айтуынша, интернетке арналған тарифтер көлеміне немесе уақытқа қарай бөлінуі мүмкін. Қазан айынан бастап технология Ақтөбе–Алматы және Қызылорда–Семей бағыттарында сынақтан өтпек. Қазір Starlink желісі Burabay Express пойызында жұмыс істеп тұр.
