Еліміздің автокөлік жолдарында лазерлік ескерту жүйесі сынақтан өткізіле бастады. Инновациялық жүйе алғаш рет Астана – Теміртау республикалық трассасында қолданылды, деп хабарлайды F16.kz.
Қарағанды облысы аумағында Астана – Теміртау автомобиль жолының 1402 шақырымында (Ошағанды ауылының маңы) лазерлік ескерту жүйесі алғаш рет сынақ режимінде уақытша орнатылды. Бұл жүйе түнгі уақытта қозғалыс қауіпсіздігін арттыруға көмектеседі. Арнайы сәулелік белгілер жүргізушінің көру аймағына тікелей түсіп, қауіпті жағдайларда дер кезінде әрекет етуге мүмкіндік бермек. Бұл тәсіл жол-көлік оқиғаларына әкелетін шаршау, зейіннің төмендеуі және шектеулі көріну мәселелерін азайтуға септігін тигізеді.
Мамандардың айтуынша, жүргізушілердің лазерлік сигналдарға жауап қайтару уақыты әдеттегі жол белгілеріне қарағанда бірнеше есе жылдам. Шетелдік тәжірибе көрсеткендей, мұндай технология енгізілген учаскелерде апат көрсеткіші 40-50 пайызға төмендеген.
Ошағанды ауылы маңындағы бұл қондырғы Қазақстан аумағында жүзеге асырылып отырған алғашқы тәжірибелік жоба.
