Биыл елімізде Мемлекет басшысының тапсырмасымен 124 теміржол вокзалын қайта жаңғырту және модернизациялау жобасы жүзеге асырыла бастады. Олардың ішінде Шығыс Қазақстан облысында орналасқан 5 нысан бар, деп хабарлайды F16.kz тілшісі.
Шығыс Қазақстан облысына жұмыс сапарымен келген көлік вице-министрі Талғат Ластаев өңір тұрғындарымен кездесіп, еліміздің көлік инфрақұрылымын дамыту бағытында жасалып жатқан жұмыстар туралы баяндап берді. Т.Ластаев мәлім еткендей, қазір өңірдегі Өскемен-1, Алтай, Күмістау, Риддер және Шемонаиха вокзалдарын жаңғырту жұмыстары қолға алынған. Бұл вокзалдың төртеуі туристік нысандар қатарына жатады және ішкі туризмді дамытуда маңызды рөл атқарады.
Қазір облыс вокзалдарында құрылыс-монтаж жұмыстары белсенді жүргізіліп жатыр. Үш нысанда бұзу (демонтаж) жұмыстары толық аяқталды, ал қалған вокзалдар бойынша жұмыстар осы айдың соңына дейін бітеді деп жоспарланып отыр. Қалай болғанда да жолаушылардың жайлылығы үшін жұмыстарды қыс түспей тұрып аяқтауға тырысамыз, – деп мәлім етті Т.Ластаев.
Вице-министрдің айтуынша, жобаның іске асырылуы вокзал инфрақұрылымын жаңартуға, жолаушыларға көрсетілетін қызмет сапасы мен жайлылықты жақсартуға, сондай-ақ өңірдің туристік әлеуетін дамыту үшін заманауи жағдай жасауға мүмкіндік бермек.
