Шығыс Қазақстан облысында жылыту маусымына дайындық қызу жүріп жатыр. Қазір өңірдің білім беру мекемелері көмірмен 93 пайыз қамтылса, денсаулық сақтау нысандарында бұл көрсеткіш 81 пайыз деңгейінде. Облыс әкімі Нұрымбет Сақтағанов алдағы жылыту маусымына дайындық жұмысын күшейтуді және жоспарланған іс-шараларды уақтылы аяқтауды тапсырды, деп хабарлайды F16.kz
Автономды қазандықтар мен тұрғын үй қоры 15 тамызға дейін толық дайын болуға тиіс. 1 қазанға дейін көмір жеткізушілермен өзара іс-қимыл тетіктерін пысықтап, қажетті отынның кестеге сәйкес жеткізілуін қамтамасыз ету, оны теміржол тұйықтарында сату мен тиеу кезінде ұзын-сонар кезекті болдырмау қажет, – деді аймақ басшысы.
РИДДЕР – ЕРЕКШЕ НАЗАРДА
Әкімнің айтуынша, барлық қала-аудандарда бұл мәселелерді тұрақты бақылауда ұстайтын арнайы штабтар жұмыс істейді. Қазір білім беру нысандары көмірмен 93%, денсаулық сақтау – 81%, әлеуметтік сала мекемелері 81% қамтамасыз етілген. Өскеменде 1753 тұрғын үйдің 1053-і дайындық паспортын алған.
Риддер қаласына ерекше назар аударылып отыр, мұнда қазандықтардың дайындығы әзірге 65% деңгейінде, алайда жылу желілерін жөндеу кестеге сай атқарылып жатыр.
Барлық жұмыс 1 қыркүйекке дейін аяқталуға тиіс, себебі Риддер – өңірдегі ең суық өңірдің бірі және мұнда жылыту маусымы ерте басталады, – деп атап өтті өңір басшысы.
КЕНДІРЛІКТІҢ КӨМІРІН ИГЕРЕДІ
Қыстан қысылмай шығу үшін облысқа 452,5 мың тонна көмір қажет, қазір оның 40%-ы жеткізілген. Зайсан ауданының әлеуметтік нысандарын отынмен қамтамасыз ету үшін облыс әкімі 15 тамыздан бастап Кендірлік кен орнында көмір өндіруді бастауды тапсырды.
Коммуналдық кәсіпорындардың берешегі мәселесіне де ерекше назар аударылды. Мәселені шешу жұмыстары жүргізіліп жатыр, қарыз бюджет түзетілгеннен кейін өтеледі. Өңірде барлық берешекті тексеретін жұмыс тобы құрылады, қарыз өтелмеген жағдайда материалдар сотқа жіберіледі. Аймақ басшысы энергетика және ТҮКШ басқармасының өзге ведомстволармен өзара іс-қимылын жолға қою қажеттігін атап өтті.
ӘЛЕУМЕТТІК ОТЫНҒА ӨТІНІМ ҚАБЫЛДАП ЖАТЫР
Өскеменде бүгінгі таңда әлеуметтік көмірге 809 өтінім түскен. Осыған байланысты халықпен түсіндіру жұмыстарын күшейту тапсырылды. Сондай-ақ өңір басшысы денсаулық сақтау нысандарының көмір қорын тексеріп, алдағы жылыту маусымында олардың үздіксіз жұмысын қамтамасыз етуді міндеттеді.
