Шығыс Қазақстан облысының әлеуметтік нысандары алдағы қысқа дайын ба? Қыстың көзі қырауда төтенше жағдайлар болмас үшін не істеліп жатыр? Аймақ басшысы Нұрымбет Сақатағновтың төрағалығымен өткен кеңесте осы және өзге де мәселелер қаралды, деп хабарлайды F16.kz.
Алдағы жылыту маусымына дайындық, өңірдің инфрақұрылымы мен экономикасын дамыту тақырыбы күн тәртібіне қойылған жиында денсаулық сақтау, білім беру және әлеуметтік нысандарды электрмен, жылумен және сумен қамтамасыз ету бойынша жауапты тұлғалар бекітілді.
Өскемен қаласының сол жағалауындағы жылумен қамту мәселесіне ерекше назар аударылды. Өйткені бұл шағын ауданда жылу мәселесі әлі де өзекті болып тұр.
Облыс әкімі энергетикалық инфрақұрылымды дамыту туристер ағынының артуымен тікелей байланысты екенін атап өтті. Бұқтырма, Сарыбел сияқты туристік аймақтарды жылу, жарық және сумен қамтамасыз ету арқылы демалыс маусымын одан ары ұзартуға және өңірдің туристік тартымдылығын арттыруға мүмкіндік бар. Осы орайда өңір басшысы биылғы кемшіліктерді ескере отырып келер жылға арналған туризмді дамыту жоспарын әзірлеу қажеттігіне назар аударды.
Ең бастысы – сапа, содан кейін ғана – уақыт. Асығыстыққа жол беріп, жұмыс сапасын төмендетіп алуға болмайды, – деді Нұрымбет Сақтағанов.
Сонымен қатар жиында өңірдің өнеркәсіп секторын қолдау және экспорттық әлеуетті арттыру шаралары талқыланды. Әрбір бағыт бойынша нақты тапсырмалар беріліп, олардың орындалуын облыс әкімі жеке бақылауында ұстайтын болды.
