Шығыс Қазақстан облысы Глубокое ауданының Зимовье ауылында «Мобайл Телеком-Сервис» ЖШС 3G мобильді интернет іске қосылды. Байланыс инфрақұрылымын дамыту мақсатында антенна-мачталық құрылым аудандық бюджет есебінен салынды, деп хабарлайды F16.kz.
Қазір ауыл тұрғындары Tele2 және Altel операторлары арқылы тұрақты мобильді байланыс пен интернет қызметін еркін пайдаланып отыр. Бұл өз кезегінде ақпаратқа қол жеткізу мүмкіндігін арттырып, адамдардың өзара байланыс орнатуын, сондай-ақ мемлекеттік және цифрлық қызметтерді тиімді пайдалануын қамтамасыз етті.
Бұл жұмыс – ауылдық өңірлердегі цифрлық теңсіздікті жоюға бағытталған нақты қадамдардың бірі. Мұндай бастамалар ауыл халқының өмір сүру сапасын арттырып, өңірдің әлеуметтік-экономикалық дамуына оң ықпал ететіні сөзсіз.
Бүгінгі таңда Мемлекет басшысының тапсырмасына сәйкес Үкімет бекіткен «Қолжетімді интернет» ұлттық жобасы аясында еліміздің шалғай өңірлерін сапалы байланыспен қамту бағытында кешенді жұмыстар жүргізіліп жатыр. Жобада үш негізгі бағыт айқындалған, соның бірі — цифрлық инфрақұрылымды дамыту. Бұл бағыт антенна-мачталық құрылғыларды орнату, талшықты-оптикалық байланыс желілері мен электр жеткізу желілерін тарту арқылы республикалық және облыстық маңызы бар автожолдар мен елді мекендерді кең жолақты интернетпен қамтамасыз етуге бағытталған.
Қазір жоба кезең-кезеңімен жүзеге асырылып, шалғай ауылдық аймақтарға интернет желісі тартылып, халық сапалы әрі қолжетімді байланыспен қамтылып жатыр.
