Өскеменде кісі өлтіріп, пәтерін тонап, артынша өртеп кеткен екі күдіктіге қатысты сот үкімі шықты, деп хабарлайды F16.kz.
Оқиға сәуір айында болған. Іс облыстық қылмыстық істер жөніндегі мамандандырылған ауданаралық сотында алқабилердің қатысуымен қаралды.
Тергеу мәліметтеріне сүйенсек, қонаққа келген ер адам үй иесімен жанжалдасып, пышақтап өлтірген. Үйде олардан басқа тағы бір әйел адам ұйықтап жатқан көрінеді. Алайда, ол қылмысты жасырып, оқиға орнынан ізін суытқан.
Қылмыскер үй иесін өлтіріп қана қоймай, пәтердегі теледидарды ұрлап, сатып, ақшасына ішімдік алғаны анықталды. Кейін қылмысын жасыру үшін пәтерге өрт қойып, өзі қашып кеткен, — дейді облыстық соттың баспасөз қызметі.
Сот отырысында ол өз кінәсін мойындаған жоқ. Десе де, алқабилердің қатысуымен өткен сот отырысында кінәлі деп танылды.
ҚР ҚК 99-бабы 1-бөлігі бойынша 12 жылға бас бостандығынан айыру, 187-бабы 1-бөлігі бойынша 40 сағат қоғамдық жұмысқа және 202-бабы 2-бөлігі 1 және 5 тармақтары бойынша 4 жыл берілді. Қылмыстық құқықбұзушылықтардың жиынтығы бойынша, жазалардың жиынтығын неғұрлым қатаң жазаға сіңіру жолымен Д.-ға түпкілікті жаза ретінде орташа қауіпсіз қылмыстық-атқару жүйесі мекемесінде 12 жыл бас бостандығынан айыру жазасын өтеу тағайындалды. Сондай-ақ марқұмның анасының азаматтық арызы бойынша моральдық зиянды өтеу толық көлемде қанағаттандырылды, — делінген соттың хабарламасында.
Ал, қылмысты жасыруға тырысқан әйел адам ҚР ҚК 434-бабы бойынша кінәлі деп танылып, 2 жылға бас бостандығынан айырылды.
ҚР «Конституцияның отыз жылдығына байланысты рақымшылық жасау туралы» Заңының негізінде жазасының үштен бір бөлігі қысқартылып, нақты 1 жыл 4 ай бас бостандығынан айыру жазасын қылмыстық-атқару жүйесінің орта қауіпсіздік мекемесінде өтеу тағайындалды.
Сот үкімі заңды күшіне енген жоқ.
