Өскеменнің іргесіндегі Новоявленка ауылының тұрғындары үйлерінің жанынан салынған асфальт-бетон зауытының жұмысына қатысты шағым айтуда, деп хабарлайды F16.kz.
Жергілікті халықтың айтуынша, олар кәсіпорыннан шығатын ащы түтіннің зардабын тартып отыр. Алайда түрлі мекемелерге жасаған шағымдары еш нәтиже бермеген. Одан бөлек, бұл зауыттың ешқандай рұқсат құжаттарсыз салынғаны анықталған.
Зауытқа рұқсат берілмегенін әкімдіктегілер де растап отыр, іс қадағалау органдарына жіберілді.
Қазір Экология департаменті VK Development ЖШС-не 10 күндік жоспардан тыс тексеріс жүргізуде. Алдын ала деректер бойынша, компанияда жұмыс жүргізуге қажетті ешқандай құжат болмаған.
Белгілі болғандай, нысанда екі бірдей компания жұмыс істеп келген, және 22 қыркүйектен бастап екеуіне қатысты бөлек тексеріс басталды.
– Компаниялардың экологиялық рұқсат алмағаны және жұмыс бастағаны туралы хабарлама бермегені анықталды. Тексеру нәтижесінде әкімшілік істер қозғалып, сотқа жіберіледі. Компанияларға ҚР Әкімшілік құқық бұзушылық туралы кодекстің 332-бабы бойынша 200 АЕК-ке дейін, ал 328-бап бойынша 700 АЕК-ке дейін айыппұл салынады, сондай-ақ үш жылға дейін қызметі тоқтатылуы мүмкін, – деп мәлім етті департаменттің экологиялық бақылау бөлімінің басшысы Меруерт Жарлығасымова.
