Шығыс Қазақстан облысының санитариялық-эпидемиологиялық бақылау департаменті қолайсыз метеорологиялық жағдайлар кезінде тұрғындарға сақтық шараларын сақтауға кеңес берді, деп хабарлайды F16.kz.
Күн райы тынық, яғни жел жоқ күндері, температуралық инверсия және басқа да факторлар атмосферадағы зиянды заттардың таралуына кедергі келтіреді. Соның салдарынан ластаушы заттар жерге жақын ауа қабатында жиналуы мүмкін. Мұндай кезеңде өнеркәсіптік кәсіпорындар белгіленген талаптарға сәйкес зиянды шығарындыларды азайту шараларын қабылдауға тиіс, — дейді мамандар.
Санитариялық дәрігерлер тұрғындарға сақтық шараларды қатаң ұстану керектігін тағы бір еске салады.
Атап айтқанда:
- денеге түсетін физикалық жүктемені азайтып, далада ұзақ уақыт жүрмеген жөн;
- мүмкіндігінше терезелерді ашпау;
- жеткілікті мөлшерде сұйықтық, яғни қайнатылған немесе тазартылған су, шай ішу;
- күнделікті ас мәзіріне көкөніс пен жемісті, жасұнық пен пектинге бай өнімдерді көбірек қосу;
- балаларды далада ұзақ жүргізбеу;
- мүмкіндік болса, қала сыртындағы немесе саябақ аумағындағы таза ауа аймақтарына шыққан жөн.
