Өскеменде «Таза Қазақстан» жалпыұлттық акциясы аясында ерекше іс-шара өтті. Бұл күні Ертіс көпірінің маңындағы Амфитеатр аумағы абаттандырылып, 100-ден астам көшет отырғызылды, деп хабарлайды F16.kz.
Бір уақытта еліміздің барлық өңірінде өтіп жатқан экологиялық акцияның Өскемендегісіне Шығыс Қазақстан облысының әкімі Нұрымбет Сақтағанов арнайы келіп қатысты.
Ұйымдастырушылардың айтуынша, акцияның мақсаты – экологиялық мәдениетті қалыптастыру, «адал адам – адал еңбек – адал табыс» патриотизм құндылықтарын дәріптеу, сондай-ақ қоршаған ортаға ұқыпты қарау.
Бүгін қаламыздың белсенді жастарымен шырша, қайың сияқты ағаштар егуге жиналдық. Негізі, ағаш отырғызу акциялары көктем уақытында өтетінін білесіздер. Алайда, білетіндер күз кезінде егілген ағаштың өнімділігі, өміршеңдігі жоғары болады деп айтады. Сол себепті, бүгін Амфитеатр маңына жастарды жинап отырмыз. Мақсатымыз – ағаш егумен ғана шектелмей, жастардың бойына, санасына экологиялық мәдениет құндылықтарын сіңіру, үлкен мен кішіні тазалыққа баулу. Мұндай іс-шаралар қаламыз бен облысымыздағы, тұтастай республикамыздағы экологиялық ахуалдың оңалуына зор септігін тигізеді деп сенеміз, – дейді Өскемен қаласы Жастар ресурстық орталығының директоры Бақытжан Ербол.
Ел мен жер болашағы үшін маңызды акциядан облыс басшылығы да шет қалмағанын жоғарыда жазғанбыз. Бұл күні іс-шараға жастармен қатар күрек ұстап, көшет отырғызған облыс әкімі Нұрымбет Сақтағанов бұл акцияның мәні қоршаған ортаның ғана емес, сондай-ақ адамның ішкі жан дүниесінің тазалығымен тығыз байланысты екенін айтты.
Бүгін өңіріміздің барлық ауданында осындай игі бастамалар жүзеге асырылуда. Жалпы алғанда, «Таза Қазақстан» акциясы тек қана ағаш отырғызу не қоқыс жинаумен шектелмейді. Бұл іс-шара – адамның рухани дүниесін тазартуға, ізгілікке ұмтылуға және еңбектің қадірін түсінуге шақыратын мағыналы қадам. Еңбектің абыройын арттырып, тазалықтың маңызын өсіп келе жатқан жас буынға бірге насихаттайық, – деп атап өтті аймақ басшысы.
Айта кетер жайт, бұл жолғы игі шараға қала тұрғындары және еріктілермен қатар, танымал эстрада әншілері де қатысты. Арасында әнші Досымжан Таңатаров пен «МузАРТ» тобының мүшесі Кенжебек Жанәбілов те болды.
Ел игілігі үшін қолға алынған кез келген істі өзіміздің ортақ міндетіміз деп санаймыз. Арнайы келіп, шырша егіп, Шығыс өңірінде де өз ізімізді қалдырғанымызға шын жүректен қуаныштымыз. Бұл ағаш – туған жерге деген махаббатымыздың символы. «Таза Қазақстан» – жай ғана экологиялық бастама емес, бұл – мәдениеттіліктің көрінісі. Осындай игі істер үзілмей, жалғасын таба берсін, – деді әнші Кенжебек Жанәбілов.
