Көлік полицейлері заңсыз көші-қонға қарсы күресті күшейтті, деп хабарлайды F16.kz тілшісі Polisia.kz сайтына сілтеме жасап.
13-17 қазан аралығында Көліктегі полиция департаментінің ұйымдастыруымен Қазақстан Республикасының аумағында шетел азаматтарының заңсыз болу фактілерін анықтау және заңсыз көші-қон арналарының жолын кесуге бағытталған «Заңсыз келуші-2025» жедел-алдын алу іс-шарасы өтті.
Бес күн ішінде көлік полицейлері көші-қон заңнамасын бұзған 191 тұлғаны анықтады. Олардың 160-ы шетел азаматтары, нақтырақ айтсақ, 145-і – ТМД елдерінен, 15-і алыс шетелден келгендер. Сот шешімімен 26 шетел азаматы Қазақстан аумағынан шығарылды. Барлық құқық бұзушылар әкімшілік жауапкершілікке тартылды.
– «Заңсыз келуші-2025» жедел-алдын алу іс-шарасы көлік инфрақұрылымы нысандарында қоғамдық қауіпсіздікті қамтамасыз етуге бағытталған кешенді жұмыстың бір бөлігі болып табылады. Мұндай іс-шаралар тұрақты түрде өткізіліп, заңсыз көші-қон деректерін анықтауға және елдегі көші-қон ахуалын тұрақтандыруға ықпал етеді, – деп жазады дерек көзі.
Көліктегі полиция департаменті азаматтар мен жұмыс берушілерді Қазақстан Республикасының көші-қон заңнамасын қатаң сақтауға шақырады.
