Республика күні, 25 қазанда Қазақстанның перзентханаларында 709 нәресте, оның ішінде 359 ұл, 350 қыз дүниеге келді, деп жазады F16.kz тілшісі Денсаулық сақтау министрлігіне сілтеме жасап.
– Бір тәуліктің ішінде босандыру ұйымдарындағы медицина қызметкерлері 704 босандыруды жүзеге асырғанын айта кеткен жөн, – деп жазады дерек көзі.
Айта кетейік, жаңа туған нәрестелердің арасында бес жұп егіз бар, бұл мерекенің тағы бір қуанышты оқиғасы болды.
Аймақтар арасында бала туу көрсеткіші бойынша әдеттегідей Түркістан облысы көш бастап тұр. Бір тәулікте бұл өңірде 119 сәби дүниеге келген. Оның 62-сі ұл, 57-сі қыз, сондай-ақ 1 егіз бар.
Дәрігерлердің мәліметінше, барлық ана мен нәрестелердің жағдайы жақсы, медициналық бақылауда.
ҚР Денсаулық сақтау министрлігі мереке күні перзентханаларда кезекшілік жасап, Қазақстанның жаңа азаматтарын қабылдаған дәрігерлерге, акушерлерге және барлық медицина қызметкеріне шын жүректен алғыс білдіреді.
– Бұл күн елдің жаңа өмірі мен болашағының символына айналды. Әрбір бала дені сау, бақытты болып өсіп, өз елінің мақтанышына айналсын! – делінген хабарламада.
