Елімізде жылыту маусымында өрттің және газдан уланудың алдын алуға бағытталған республикалық профилактикалық айлығы жалғасуда, деп хабарлайды F16.kz.
Айлық аясында еліміздің өңірлерінде тұрғын үй секторына профилактикалық рейдтер ұйымдастырылып келеді. Мәселен, Шығыс Қазақстан облысы Төтенше жағдайлар департаментінің қызметкерлері жылыту маусымы басталғалы бері тұрғын үй секторында 18 мыңнан астам үйді аралап, өрт қауіпсіздігі талаптарының шамамен 11 мың бұзушылығын анықтаған, олардың 1 190-ы орнында жойылды.
Әкімдіктермен бірлесе отырып, газдың және жану өнімдерінің қауіпті концентрациясын анықтайтын датчиктерді орнату жұмыстары жалғасуда. Соңғы жылдары 17 мыңнан астам құрылғы орнатылып, олардың көмегімен 42 адамның өмірі құтқарылды. Биылғы жылыту маусымында қосымша 200-ден астам датчик орнатылып, жеке тұрғын үйлердегі пештерді ретке келтіру жұмыстары жүргізілді.
Еліміздің Төтенше жағдайлар министрлігі халыққа өрт қауіпсіздігі ережелерін қатаң сақтау қажеттігін ескертеді:
- жарамды пештер мен электр аспаптарын ғана пайдаланыңыз;
- пештің қызып кетуіне және электр желілерінің шамадан тыс жүктелуіне жол бермеңіз;
- мұржаны уақтылы күйеден тазартыңыз;
- үнемі пештің және электр аспаптарының ақауларын тексеріп отырыңыз;
- пеш жағуды балаларға тапсырмаңыз;
- жағу үшін тез тұтанатын сұйықтықтарды пайдаланбаңыз.
