2025 жылғы 15 қазанда Шығыс Қазақстан облысы бойынша Экология департаментінің мамандары Марқакөл ауданындағы «Шаңдыбұлақ-1» учаскесінде заңсыз алтын қазуға дайындалған жеке тұлғаны анықтады, деп хабарлайды F16.kz.
Тексеріс барысында учаскеде экологиялық рұқсатсыз бағалы металдарды өндіруге дайындық жұмыстары жүргізіліп жатқаны белгілі болды. Жұмысқа ауыр техника мен кен жууға арналған өндірістік жабдықтар да тартылған. Бұл Қазақстан Республикасы экологиялық заңнамасының талаптарын өрескел бұзу болып табылады.
Тексеріс нәтижесі бойынша құқық бұзушыға қатысты әкімшілік шаралар қолданылып, іс материалдары Марқакөл аудандық сотына заңда белгіленген тәртіппен қарауға жолданды.
Экология департаменті қоршаған ортаға кері әсер ететін нысандардың қызметіне мониторинг жүргізу, экологиялық құқықбұзушылықтарды анықтау және алдын алу бағытында жүйелі жұмыстарды жалғастыра беретінін хабарлайды.
