Облыс орталығындағы ерекше білім беру қажеттілігі бар балаларға арналған Bastau мектебі биыл қазан айынан бастап есігін айқара ашты. Бұл — «Даму» қорының қолдауымен жүзеге асырылған ауқымды жобалардың бірі, деп хабарлайды F16.kz.
Оқу орны негізінен 108 орынға есептелген, бүгінде онда 62 бала білім алып жатыр.
— Біздің мектепте аутизм спектрінің бұзылуы, балалардың сал ауруы және басқа да ерекшеліктері бар балалар оқып, оңалтудан өтеді. Олар күні бойы жаңа мектепке бейімделген жалпы білім бағдарламаларын меңгереді. Мүғалімдерден бөлек, педагог, логопед және емдік дене шынықтыру мамандары жұмыс істейді. Балалар үшін спорттық секциялар мен шығаршамылық үйірмелер қарастырылған. Барлық оқыту және оңалту қызметтері тегін ұсынылады, — деп атап өтті “Bastay” түзету мектебінің директоры Лилия Мамбурова.
Мектептің ашылғанына ұзақ уақыт болған жоқ. Десе де, мұнда тәжірибелі мамандар жұмыс істейді. Себебі, бұл қалада қолға алынған алғашқы жоба емес. Мектептің негізін қалаушылар 8 жыл бұрын қордың көмегімен «Страна чудес» балабақшасын ашқан.
— Біз «Дамумен» алғаш рет жұмыс істеп жатқан жоқпыз. Бұл мектеп — «Страна чудес» балабақшасының жалғасы. Яғни, балабақшаны тәмәмдаған бүлдіршіндер осы мектепте білім алып, дамуын жалғастыра алады, — деді мектеп директоры.
Айта кетейік, «Даму» қоры қазіргі күні кәсіпкерлерге жеңіл несие, кепілзат жеткізілксіз болған кезде ішінара кепілдік беру және пайыздық мөлшерлеменің бір бөлігін субсидиялау бойынша көмек көрсетеді. Жыл басынан бері өңірде жалпы сомасы 15,1 млрд теңге болатын 105 жаңа жоба субсидияланған.
