Биыл елімізде 80-нен астам вокзал пайдалануға беріледі. Бұл туралы Көлік вице-министрі Мақсат Қалиақпаров мәлім етті, деп хабарлайды F16.kz порталы.
Оның айтуынша, аталмыш жобаның тапсырыс берушісі – «Қазақстан теміржолы» Ұлттық компаниясы, ал мердігер ұйымдар жергілікті атқарушы органдар тарапынан ұсынылған компаниялар.
– Қазіргі уақытта 100 нысан бойынша жобалық-сметалық құжатама мемлекеттік сараптамадан өтуде. Қыс мезгіліне дайындық қамтамасыз етілген. Жолаушыларға арналған уақытша құрылыстар мен күту аймақтары әзір. 124 нысанның 121-інде құрылыс-монтаж жұмыстары жүргізілуде. Ал қалған 3 вокзал бойынша тарихи-мәдени мұра нысандары ретінде ғылыми-зерттеулер жағасуда. Ол нысандарға жөндеу 2026 жылы жүргізілетін болады, – деді вице-министр.
Ол, сонымен қатар вокзалдардың шамамен 70%-ы отыз жылдан астам уақыт бойы жөндеу көрмегенін айтты. Техникалық тексерулер нәтижесінде кейбір тіреуіш бағандары мен жекелеген конструкциялардың ары қарай пайдалануға жарамсыз екені анықталған. Осыған байланысты 42 нысан толықтай бұзылды.
– Биыл 80-нен астам вокзал пайдалануға беріледі. Жергілікті атқарушы органдар мен мердігер ұйымдар құрылыс-монтаж жұмыстарының қарқынын күшейтуі қажет, – деді ол.
Айта кетейік, аталған 80 вокзалдың ішінде Шығыс Қазақстанда орналасқан бес нысан бар. Қазір өңірдегі Өскемен-1, Алтай, Күмістау, Риддер және Шемонаиха вокзалдарын жаңғырту жұмыстары қолға алынған. Бұл вокзалдың төртеуі туристік нысандар қатарына жатады және ішкі туризмді дамытуда маңызды рөл атқарады.
