Өскеменде Ұлттық ұлан сарбаздары 300 шақырымдық шеру жасады

«Шығыс» өңірлік қолбасшылығына қарасты 5518 әскери бөлімінің сарбаздары Өскемен қаласынан Шемонаиха қаласына дейін барып, қайта кері қайтты.

Әскери бөлімнің 2-2023 және 1-2024 жылғы шақырылымның мерзімді әскери қызметшілері қатысқан 300 шақырымдық тактикалық-арнайы сабағы өткізілді.

$\"\"$ Оқу-жаттығу барысында жас жауынгерлер өздерінің алған білімдерін іс жүзінде қолданып, қиян-кескі оқыс оқиғада техниканы басқарып, әртүрлі кедергілерді еңсеріп, шектеулі және ойық өтпелерден мүлтіксіз өтті.

– Ұлттық ұлан қатарына шақыртылғанда жауынгерлік техниканы басқарудан хабарсыз едім. Ұзақ қашықтықты қамтыған бүгінгі шеруден мол тәжірибе алдым. Жол қауіпсіздігін сақтай отырып, әскери техниканы діттеген жеріне жеткізу үлкен жауапкершілікті талап етеді, – дейді 5518 әскери бөлімінің қатардағы жауынгері Олжахан Санжар.

$\"\"$ Ұлттық ұланның жас жүргізушілері тәжірибеде теориялық білімдерін шыңдап, әскери техниканы басқару қабілетін көрсетті, сондай-ақ жауынгерлік машинамен түрлі кедергілерді еңсерудің барлық мүмкіндіктерін жүзеге асырды. Алдағы уақытта 300 шақырымды еңсерген жас жауынгерлер әскери көліктерді басқаруға рұқсат алатын болады.