ШҚО полицейлері сужаңа 198 қызметтік автокөліктің кілтіне ие болды. Кілттерді табыстау рәсімі Өскемендегі Республика алаңында өтті, деп хабарлайды F16.kz тілшісі.
Салтанатты іс-шараға қатысқан Шығыс Қазақстан облысының әкімі Нұрымбет Сақтағанов тәртіп сақшыларын жаңа көліктерге ие болуымен құттықтап, жұмыстарына сәттілік тіледі.
– Бұл шешім – мемлекет пен облыс тұрғындарының полиция қызметкерлеріне деген жоғары сенімінің көрінісі. Ішкі істер органдарының мамандары тәулік бойы қоғамдық тәртіпті күзетіп, шақыртуларға жедел әрекет етеді, түрлі жағдайларға тап болған азаматтарға көмек көрсетеді. Тәртіп сақшыларының кәсібилігі мен адалдығының арқасында өңірде тұрақты әрі қауіпсіз орта қалыптасып отыр, – деді аймақ басшысы Нұрымбет Сақтағанов.
Облыс әкімдігінің баспасөз қызметі таратқан ақпаратқа сәйкес, берілген автокөліктер қызмет атқаруға қажетті барлық құрал-жабдықпен қамтылған. Бұл әсіресе шалғайдағы ауылдық округтерде жұмыс істейтін полиция қызметкерлерінің жеделдігі мен тиімділігін арттыруға мүмкіндік береді. Техникалық мүмкіндіктердің артуы патрульдік бөлімшелердің, жедел-тергеу топтарының және басқа да қызметтердің жұмысын жақсартуға жағдай туғызады.
