Бұқтырма өзені қауіп төндіріп тұр &#8212; ШҚО

Катонқарағай ауданы, Шыңғыстай ауылының іргесінен ағатын Бұқтырма өзені бір көшенің тұрғындарына қауіп төндіріп тұр.

Жергілікті жұрт, өзен арнасының бұрылуына жағалаудан көп мөлшерде қиыршық тас пен құм қазып әкетуі себеп болғанын айтады, деп хабарлайды F16.kz тілшісі.

Арыны қатты асау өзен жағалауды «жеп», елдің бақшасына таяп қалды. Ауылдағы ағайын «енді бірер жылда Бұқтырма тұтас бір көшені ағызып әкетеді» деп дабыл қағып отыр.

— Бұқтырма осы жерден екі жүз метр ары болатын. Содан Катонқарағайға аурухана саламыз деп, осы Бұқтырманың жағалауынан гравий тасыды. Катондағы үш этажды аурухана тұтас осы жердегі гравиймен салынған. Содан су бері ауып кетті. Бері қарай, міне, жарға соғып жатыр. Міне, осы күздігүні бері кетіп қалды, енді көктемде мынау енді мына қораға баратын болу керек. Өтірік айтпасам, он жыл болды. Осы жардың астына бір километр екі жүз метр жерге дамба қоямыз деп өкімет ақша бөлді. Тендер ойнап, міне, кірісеміз деп жатқан . Содан жоқ, ақша да жоқ, желге ұшып кетті. Енді судың да сұрауы бар ғой. Сол кезде ақшаның қайда кеткеніне ешкім жауап бермейді, — дейді ауыл тұрғыны Болатхан Нұрсапаров.

$\"\"$ Ауылдың тағы бір тұрғыны Ермек Сатышевтың айтуынша, дамбыны үш рет салған. Дегенмен, одан нәтиже жоқ.

— Үш рет салған дамбыдан түк жоқ, әне. Дамбы салудың аты – ақша жуу. Ертеңгі күні ол жерде мал құлайды. Малды қойып, адам құлайды. Анандай жартас еш жерде жоқ. Қанша рет айттық. Шіркін-ай, егер мына жерде Бердібек Сапарбаев аман-есен жүрсе, баяғыда осыны бір жағына шығаратын еді. Сапарбаев арқылы басталған болатын, қалды сол қалпы. Одан кейінгілер келді, ақша жуып кетті, — дейді шыңғыстайлық тұрғын.

Ал Катонқарағай ауданының әкімдігі бұл мәселенің аудан әкімінің тікелей бақылауында тұрғанын айтады.

— Бұл мәселе бойынша да қазіргі уақытта тиісті мекемелермен бірлескен жұмыстар қарқынды түрде жүргізілуде. Көктемгі дайындық шаралары шеңберінде қажетті ұйымдастыру жұмыстары қолға алынған. Мәселе ауданның өзекті проблемаларының тізіміне енгізіліп, оны шешуге бағытталған іс-шаралар жоспары бекітілді. Бұл жоспар аясында барлық жұмыстар жүйелі түрде жүзеге асырылып жатыр, — деп хабарлады әкімдік.

Айтуларынша, аудан әкімі Данияр Дүйсембаев төтенше жағдайлар бөлімінің бастығы Нияз Арманов және «КажСервис» ЖШС-ның 27-жол пайдалану уческесінің басшысы Данияр Қабдуалиевпен кездесу өткізген екен. Кездесуде көктемгі су тасқынына дайындық, аудан аумағындағы көпірлер мен су өткізгіш құбырларды қар мен мұздан тазарту мәселелері бойынша бірқатар тапсырмалар беріліпті. Аудан басшысы табиғи апаттардың алдын алу шараларының маңыздылығын айта отырып, осы бағытта жүйелі жұмыс жүргізу қажеттігін ескерткен.

Төтенше жағдайлар бөлімінің бастығы Нияз Армановқа аудандағы су тасқыны болу қаупі жоғары аймақтарды анықтап, алдын алу шараларын уақтылы орындау және жеке құрамның, техникалардың дайындығын үнемі бақылауда ұстау тапсырылды.
Ал 27-жол учаскесінің басшысы Данияр Қабдуалиевке жолдың уақтылы, сапалы тазалануын әрі еріген қар суының жолға жайылып кетпеуін қадағалау сияқты нақты тапсырмалар берілген.

Катонқарағай ауданының әкімі Данияр Дүйсембаев бұл мәселемен арнайы барып танысып қайтқанын мәлім етті.

— Мен аудан әкімі болып 2024 жылғы 6 қыркүйекте тағайындалдым. Сол айдан бастап ауданның 2025 жылғы көктемгі су тасқынына дайндығы жұмыстарымен танысқан кезде дәл осы мәселені өзім көріп қайтқанмын. Ауылдық округ әкіміне тиісті тапсырмалар берілді. Жоспарда бар. Көктемге дейін тиісті жұмыстар атқарылатын болады. Бұл мәселелер ТЖ басшысымен де талқыланды, — деді әкім.

$\"\"$