Шығыс Қазақстан облысында 2026-2035 жылдарға арналған туристік экономиканы дамытудың бас жоспары әзірленді. Құжат жыл бойы туристерді қабылдауға мүмкіндік беретін ұсыныстар қалыптастыруды, алты негізгі туристік аумақты дамытуды, инвестиция тартуды және саладағы жүйелі мәселелерді шешуді көздейді, деп хабарлайды F16.kz.
Бас жоспарда бірін-бірі толықтыратын алты туристік аумақ белгіленген: Катонқарағай, Риддер, Бұқтырма, Марқакөл-Зайсан, Өскемен қаласы мен оның маңындағы аумақтар және Үлкен Нарын.
Шығыс Қазақстан облысының әкімі Нұрымбет Сақтағановтың бастамасымен Бұқтырма су қоймасы жағалауында Altai City туристік қалашығын құру тұжырымдамасы әзірленді.
Сондай-ақ қазір Тереңсай асуында Kokterek Park жобасының тұжырымдамасы дайындалып жатыр.
Бас жоспарды әзірлеу барысында әуежай, теміржол және автовокзалдар, музейлер мен бірқатар орналастыру нысандары зерделенген. Мәселен, Өскемен автовокзалының түнгі уақытта жұмыс істемейтіні, ал санитарлық бөлмелердің сағат 20:00-ден кейін жабылатыны анықталыпты. Ал бұл кезде түнгі рейстер қатынап жатады. Сондықтан жолаушылардың көлігін күтуіне қолайлы жағдай жасалуы қажет екені айтылды.
