Бүгінде Тарбағатай ауданының Қызылқайың учаскесінде осыдан бірнеше жыл бұрын басталған барлау жұмыстары қызып тұр. Бұл туралы Тарбағатай ауданы әкімінің орынбасары Марат Қызов мәлім етті, деп хабарлайды F16.kz.
Бүгін Өңірлік коммуникациялар қызметінде өткен брифинг барысында Маңырақ тауының аумағында жүргізіліп жатқан кен барлау жұмыстары туралы да айтылды.
Аудан әкімі орынбасарының сөзіне сенсек, Қызылқайың мыс кенішінің ашылуы экономикаға тың серпін беріп қана қоймай, әлеуметтік мәселелердің шешілуіне де септігін тигізеді.
– Бұл біздің ауданда жүзеге асырылатын ең ауқымды жобаның бірі болмақ. Қазір жұмыстар жоспарға сай жүргізілуде. 2018-2026 жылдар аралығында Қызылқайың учаскесінде барлау жұмыстары жүргізілуі керек. Кен қоры бар екені расталған жағдайда, 2027-2028 жылдары жобалық-сметалық құжаттамасы әзірленіп, инфрақұрылым жұмыстарын жүргізу жоспарланған. Ал 2028 жылы комбинаттың құрылыс жұмыстары басталады деп күтілуде, – деген Марат Қызов комбинат шамамен 2030 жылы іске қосылатынын жеткізді.
Оның айтуынша, өндіріс толық қуатына енген соң комбинатта 1 500 адам тұрақты жұмыспен қамтылады. Ал өндіріс орнының құрылыс жұмыстарына екі мыңнан астам адамды тарту жоспарланып отыр.
– Комбинат негізінен мыс қорыту бағытында жұмыс жүргізетін болады. Дегенмен, егер де Тұғыл ауылының маңында экономикалық аймақ құрылатын болса, онда инвестор мысты өңдеу жағын да қарастыруға әзір. Ол үшін Тұғылда порт бой көтеріп, Майқапшағаймен екі ортада теміржол салынуы керек, – дейді аудан әкімінің орынбасары.
Марат Қызов қазір Тарбағатай ауданында комбинатты электр қуатымен тұрақты қамтитындай энергия көзі жоқ екенін айтуда. Сондықтан комбинаттың тұрақты жұмыс істеуіне мүмкіндік беретін инфрақұрылымдық мәселелерді шешу жағы қарастырылып жатқан көрінеді.
– Қоршаған ортаны қорғау жағын да назардан тыс қалдырмайтынымыз анық. Жұмыстар жүргізіліп жатқан жерлерді құзырлы органдар мамандары, экологтар келіп тексерді, өз ұсыныс-пікірлерін айтты. Әрине, жергілікті халық тарапынан түсініспеушілік болды. Бірақ, барлық жұмыс заң шеңберінде жүргізілуде екенін айтқым келеді, – дейді аудан әкімінің орынбасары.
Еске салайық, Қызылқайыңдағы барлау жұмыстары туралы бұған дейін де жазған болатынбыз.
