Үкімет резервінен Шығыс Қазақстан облысындағы жылу желілерін жөндеу-қалпына келтіру жұмыстарын жүргізуге 2,5 миллиард теңгеден астам қаражат бөлінді. Бұл жөніндегі қаулыға Премьер-министр Олжас Бектенов қол қойды, деп хабарлайды F16.kz.
Құжатқа сәйкес қаражат Риддер қаласы мен Қасым Қайсенов кентінің жылу желілеріндегі жөндеу жұмыстарын аяқтауға бағытталады. Бөлінген қаражаттың негізгі сомасын Риддер қаласындағы жылу желілерінің жалпы ұзындығы 5,9 шақырымға жететін учаскелерін күрделі жөндеуге пайдалану жоспарлануда.
– Ұлан ауданы Қасым Қайсенов кентінде ұзындығы 9 шақырым жылу желілерін жаңартудың екінші кезегін іске асыруға 113 миллион теңге бағытталды, – деп хабарлайды Үкіметтің баспасөз қызметі.
Шығыс Қазақстан облысының елді мекендерінде жылу желілері 30 жылдан астам уақыт бойы пайдаланылып келеді. Осы кезеңде нысандарда бірде-бір күрделі қайта құру жұмыстары жүргізілмеген. Белгілі болғандай, бүгінде облыстағы жылу желілерінің тозу деңгейі орта есеппен 55%-дан асады, ал жекелеген елді мекендерде 75%-ға жеткен.
Естеріңізге сала кетейік, ағымдағы жылдың мамыр айында ҚР Үкіметінің резервінен екі қазандық агрегатын жөндеуге, №5 редукциялық-салқындату қондырғысының технологиялық процестерін басқарудың автоматтандырылған жүйесін енгізуге, сондай-ақ Риддер қаласының ЖЭО-ның өз қажеттіліктерін қамтамасыз ететін электр техникалық жабдықтың бір бөлігін ауыстыруға шамамен 1,7 миллиард теңге бөлінген. Соңғы екі жылда қалада жүргізілген жұмыстардың нәтижесінде желілердің тозу деңгейі 82%-дан 66,8%-ға дейін төмендеді.
