Инклюзивті орта қалыптастыру – білім беру саласындағы негізгі басымдықтардың бірі. Бүгінде елімізде осы бағытта «Мүмкіндігі шектеулі балаларды (тұлғаларды) кешенді қолдау туралы» жаңа Заң жобасы әзірленіп жатыр, деп хабарлайды F16.kz тілшісі Оқу-ағарту министрлігіне сілтеме жасап.
Бұл маңызды құжат Мемлекет басшысының IV Ұлттық құрылтай отырысында берген тапсырмасы бойынша және ҚР Парламенті Сенаты депутаттарының бастамасымен әзірленуде. Оның негізгі мақсаты – ерекше қажеттіліктері бар балалардың сапалы білім алуы үшін медициналық, білім беру және әлеуметтік қызметтерге тең әрі үздіксіз қолжетімділікті қамтамасыз ету.
– Заңның қабылдануы кешенді көмекке мұқтаж балалар үшін келісілген, атаулы және тұрақты қолдау жүйесін құруға мүмкіндік береді. Құжат Қазақстанға 2024 жылы БҰҰ-ның Мүгедектер құқықтары жөніндегі комитеті берген ұсынымдарын іске асыру мақсатында әзірленді, – дейді ҚР Оқу-ағарту министрлігінің Инклюзивті және арнайы білім департаментінің директоры Бұлбұл Елеусінова.
Қазақстанда ерекше білім беру қажеттіліктері бар 235 мың бала бар. Бұл салада 508 арнайы білім беру ұйымы жұмыс істейді. Атап айтсақ, 110 Психологиялық-медициналық-педагогикалық комиссия, 230 Психологиялық-педагогикалық түзеу кабинеті, 99 арнайы мектеп, 45 арнайы мектепке дейінгі ұйым, 13 оңалту орталығы және 11 аутизм орталығы жұмыс істеп тұр.
Инклюзивті білім беруді кеңейту үшін әрбір білім беру ұйымында психологиялық-педагогикалық қолдау қызметі құрылды, 29 мыңнан астам маман көмек көрсетуде, мыңнан аса инклюзия кабинеті жұмыс істейді. Жалпы, елімізде балаларды арнайы психологиялық-педагогикалық қолдаумен қамту деңгейі 85%-ға жетіп отыр.
