Өскемендік полицейлер балаларға жол қозғалысы ережелерін шоу форматында түсіндіре бастады, деп хабарлайды F16.kz тілшісі Polisia.kz сайтына сілтеме жасап.
Шығыс Қазақстан облысының орталығында жол қозғалысы ережелеріне арналған интерактивті бағдарлама қолға алынды. Ерекше шоуға алғашқы күні 500-ден астам бала қатысты. Балаларға арналған танымдық іс-шараны Өскемен қаласы полиция басқармасы қала әкімдігімен және «Юбилейный» кинотеатрымен бірлесіп ұйымдастырды. Іс-шараның басты мақсаты – балалар мен жасөспірімдердің жолда қауіпсіз жүріп-тұру мәдениетін қалыптастыру.
Жоғарыда жазғанымыздай, алғашқы күннің өзінде-ақ бағдарламаға 500-ден астам оқушы қатысты. Олар интерактивті тапсырмалар мен викториналарға қатысып, жол жүрісі қағидаларын білу бойынша өзара сынға түсті. Шара соңында балалар анимациялық фильм тамашалады.
Жас қатысушылар тек негізгі жол қозғалысы талаптарын қайталап қана қоймай, полиция қызметкерлеріне сауалдар қойып, нақты жол жағдайында қалай әрекет ету керектігі бойынша пайдалы кеңестер алды. Мерекелік атмосфера мен тікелей қарым-қатынас балалардың маңызды ақпаратты жақсы есте сақтауына септігін тигізгені сөзсіз.
– Мұндай кездесулердің мақсаты – балаларға жастайынан жол ережесін сақтаудың маңыздылығын түсіндіру. Жолдағы қауіпсіздік әрқайсымыздан басталады. Балалардың белсенділік танытып, өз білімдерін көрсетуі бізді қуантады, – дейді ШҚО Полиция департаменті бастығының орынбасары Рифхат Тауфиков.
Сонымен қатар бұл күні полиция қызметкерлері кинотеатр алдындағы алаңда көпшілік назарына қызметтік патрульдік автокөліктер мен қоғамдық тәртіпті, жол қауіпсіздігін қамтамасыз етуге арналған арнайы техниканы ұсынды.
Еске сала кетейік, ерекше форматтағы шоу «Юбилейный» кинотеатрында 8 қазанға дейін жалғасатын болады.
